PASSE I CONFINS CU LA TÔ LENGHE

   

Môf il to confin linguistic cul progjet des Ativitâts in Classe su Europeane (ECCA).

 

Midiant des Ativitâts in Classe su la Cjarte Europeane  (il progjet ECCA – European Charter Classroom Activities), lis scuelis a puedin lavorâ cun ativitâts su la Cjarte Europeane des Lenghis Regjonâls e Minoritariis. Il progjet ECCA al à l’obietîf di disvilupâ ativitâts in classe e di meti adun zovins e insegnants di regjons linguistichis diviersis par mieç di un program di scambis.

Ce fasarìno?

Disvilup des ativitâts in classe

Scambi di students e di insegnants

Tal mês di Fevrâr dal 2019 il Consei di Europe al à disvilupât un strument pes scuelis europeanis par podê lavorâ in maniere plui ative su la Cjarte Europeane des Lenghis Regjonâls o Minoritariis. Intant, chest strument, lis cussì clamadis “Liniis vuide educativis par puartâ la diversitât linguistiche tes classis” al è stât voltât in cetantis lenghis. Noaltris siet partners de “Rêt par Promovi la Diversitâts Linguistiche” (NPLD) o vin inviât il progjet ECCA par disvilupâ ancjemò di plui chest strument in ativitâts in classe plui specifichis pensadis pal ûs tal setôr linguistic. Lis scuelis interessadis a chest materiâl educatîf a puedin discjamâlu culi.
FURLAN ECCA guidelines

Il progjet ECCA al met adun zovins e insegnants di regjons linguistichis diferentis. Cjalant cemût che une lenghe e je tratade intun altri Stât, si pues capî miôr ce che si sint e si pense su la proprie lenghe. Parcè pensistu che i zovins in Friûl e te Val di Fasse a fevelin ancjemò par furlan e par ladin fra di lôr a scuele, invezit che dome par talian? Ce isal che al rint la zoventût catalane e chê rumene in Ongjarie braurose des lôr lenghis? In chest progjet ECCA o metarìn impins un program di scambis in colaborazion cun altris scuelis. Cjatantsi cu la int dal puest a scuele e a cjase intun paîs là che si fevele une lenghe che, tant che la tô, no je la uniche lenghe di chel paîs o di chê regjon, al è pussibil capî miôr ce che une lenghe e pues significâ.

Cualis scuelis partecipino?

News

Conference finâl dal progjet ECCA il prin di Otubar

Il prin di Otubar, in provincie di Trent (Italie), si fasarà la conference finâl dal progjet sperimentâl European Charter Classroom Activities (ECCA) – Ativitâts in Classe su la Cjarte Europeane -. In cheste conference i partners ECCA a presentaran i risultâts dal progjet. Cun di plui a fasaran une visite a Luserna, un piçul paîs, dulà che e vîf une des minorancis plui piçulis de Europe, i Cimbris. Tal 2019 il progjet ECCA al à vût une sovenzion dal Network to Promote Linguistic Diversity (NPLD) – Rêt par Promovi la Diversitât Linguistiche -. Magari cussì no, par vie de situazion pandemiche causade dal covid-19, une part des ativitâts e je stade anulade.

Dopo de conference finâl i partners dal progjet ECCA a decidaran se e cemût lâ indevant cuntune prosecuzion dal progjet. Par plui informazions sul progjet e sui partners, cjalait chi: www.thisismylanguage.eu

Join Zoom Meeting

https://us02web.zoom.us/j/81914140161?pwd=cUlTVHM2QUJyMkd1RjJGNDFNT2d3dz09

Meeting ID: 819 1414 0161
Passcode: ECCATrento

 

A son stadis publicadis lis lezions ECCA pes scuelis de Frisie

Pal progjet ECCA la provincie de Frisie e à svilupât in colaborazion cun Afûk e cun Cedin trê lezions su la Cjarte Europeane des Lenghis Regjonâls o Minoritariis. Lis lezions a stimolaran i students tra i 11 e i 16 agns a pensâ a ce puest che e à la lôr lenghe tal contest european. Lis lezions digjitâls metudis a disposizion pes scuelis secondariis de Frisie a son dutis disponibilis in trê lenghis: frison, olandês e inglês. Par plui informazions, cjalait chi: https://ecca.edufrysk.nl/. Chest mês dutis lis scuelis de provincie de Frisie a ricevaran un poster ECCA cun chestis lenghis metût a disposizion par chestis lezions, par che a sedin stiçadis tal scomençâ lis ativitâts.

I partners dal progjet ECCA che a vedin voie di voltâ o di adatâ al lôr contest lis lezions, il poster o il volantin su la Cjarte, a son preâts di contatâ il referent de provincie de Frisie, y.boersma@fryslan.frl.

Al è stât anulât il program di scambi dal progjet ECCA

Prime di chest Istât i partners dal progjet ECCA a àn decidût di anulâ dal dut il program di scambi scomençât tal 2019. Tant che part dal progjet, i students di diviersis regjons linguistichis a àn partecipât tal 2019 al concors par realizâ un video su la impuartance de lenghe. I vincidôrs di chest concors a son stâts selezionâts par partecipâ a un program di scambi intune di chês altris regjons linguistichis. Par plui informazions, cjalait chi: https://youtu.be/cHpS6UcYbpo. Par vie des consecuencis dal covid-19 il program di scambi al è stât rimandât diviersis voltis. Magari cussì no i organizadôrs ae fin a àn scugnût decidi di anulâ cheste part dal progjet. I students cjapâts dentri a son stâts dut câs premiâts cuntun certificât ECCA e/o cuntun voucher. Daûr dai disvilups dal covid-19 tai agns che a vegnin, al po sei che al sarà fat un gnûf program di scambi par gnûfs students.

ARCHIVE

Visit our ECCA YouTube channel for more new videos

Inzornaments covid-19

Intai ultins trê mês, la plui part dai students e dai insegnants che a partecipin al progjet ECCA no à podût frecuentâ lis scuelis par colpe dal covid-19. Ducj i partecipants a son stâts informâts che par vie dal virus no vin podût lâ indevant cu la atuazion dal lunc program di scambi previodût par cheste Vierte. O vin di pôc decidût, cui colaboradôrs de NPLD coinvolzûts, che o cirarìn di lâ indevant cu la part di scambi al principi dal 2021. Cu la nestre newsletter ECCA, o tignarìn informâts di persone i students e i insegnants sui gnûfs svilups. Chest Istât o varessin gust di rivâ a cognossi un tic miôr ognidun di lôr, implementant cualchi ativitât digjitâl di ECCA, e o sperìn ancje di podê publicâ cualchi risultât su chest sît web.

Striche a fumets Covid-19 intes nestris lenghis

Il famôs artist talian Fabio Vettori al à realizade une striche colorade cu lis misuris di cjapâ par prevignî il covid-19. Diviers colaboradôrs de Rêt pe promozion de diversitât linguistiche (NPLD) a àn voltât il poster cu la striche in diferentis lenghis e dialets. La presidente de NPLD, Sietske Poepjes: “O pensìn che al sedi une vore impuartant che lis informazions su la crisi covid-19 a sedin a disposizion ancje intes nestris lenghis, tant che il furlan, l’ongjarês, il catalan, il ladin e la mê lenghe, il frison. Cheste tipologjie di informazions rilevantis no varès di jessi disponibile dome intes lenghis uficiâls de UE, ma ancje intes lenghis dal nestri cûr.”

Achì o cjatais la striche intes lenghis che a jentrin intal progjet ECCA.
CATALA ENGLISH FRYSK FURLAN LADIN MAGYAR

Panoramiche des ativitâts di ECCA

Ancje se fin cumò no vin podût meti in vore il program di scambi, intal ultin an scolastic a son stadis realizadis diviersis ativitâts di classe. Achì o cjatais cualchi informazion sul program ECCA fin cumò, clicant sui leams.

Striche a fumets Covid-19 intes nestris lenghis

Il progjet ECCA al smire a disvilupâ ativitâts in classe e a svicinâ zovins e insegnants di diviersis regjons linguistichis midiant di un program di scambi. Par cause dal corona-virus pal moment e je stade cancelade la nestre prime part dal program di scambi previodude de Spagne e de Italie pe fin di Març cun destinazion Romanie. I scambis par chei altris students e pai lôr insegnants in diviersis regjons linguistichis a son previodûts pai mês che e vegnin, in Avrîl e in Mai. Ducj i partners dal NPLD cjapâts dentri tal progjet a son in contat cui insegnants, cui students e cui lôr gjenitôrs pai controi sanitaris. Se pussibil, il program ECCA al larà indenant ma dut al dipent dai disvilups dal virus in dute Europe. Se nol sarà pussibil o resonevul puartâ indenant il program ECCA prime di chest Istât, o cirarìn di fâlu intal gnûf an scolastic cui stes students e insegnants selezionâts. Te sperance che une dì o sarìn in stât di passâ i confins cu lis nestris lenghis.

Partecipe al nestri concors e vinç une esperience di scambi!

Vuelistu passâ i confins cu la tô lenghe? Se la tô scuele e partecipe al progjet ECCA e tu tu fevelis furlan, cjame un video curt su YouTube sul teme: “Ce significhie par te la tô lenghe, vuê e tal avignî?” Cui che al produsarà il miôr video YouTube al vinçarà une esperience di scambi! In colaborazion cu la tô scuele, tal 2020 tu podarâs lâ par cualchi zornade in scambi intune altre regjon linguistiche in Europe, dulà che tu sarâs ospitât di une famee che e fevele ongjarês (RO), frison (NL) o catalan (ESP). Partecipe al concors e travierse il confin de regjon cul furlan!
PDFYouTubeFRIU

Incuintri di presentazion ai 15 di Novembar dal 2019 a Bruxelles

Ai 15 di Novembar a Bruxelles si presentarà il progjet ECCA cuntune cunvigne speciâl. A chest prin incuintri a saran presints ducj i partners dal NPLD che a partecipin al progjet, adun cui rapresentants des scuelis che a àn aderît. I relatôrs de cunvigne a saran: Sixto Molina, responsabil dal Segretariât pe Cjarte Europeane des Lenghis Regjonâls e Minoritariis; Fernando Ramallo, de Universitât di Vigo (Galizie/Spagne) e Vicent Climent pal NPLD. Inte cunvigne o esplorarìn cemût lâ indenant cu lis ativitâts in classe che a rivuardin la Cjarte Europeane e i insegnants a saran formâts su chest argoment.
Kickoff ECCA programme 15.11.19

“La lenghe no je dome un mieç di comunicazion, e je part di cui che tu sês. La Cjarte Europeane e da dirits ai zovins des regjons linguistichis, alc che dispès no san nancje di vê. Chest progjet ECCA al vûl sensibilizâ e fâ cognossi miôr la Cjarte Europeane.”

Sabrina Rasom, referente dal progjet ECCA
Provincie di Trento